A hmasabik ah kanmah CIM Motto a simi Bible caang rel hmasa hna usih!
"Minung hi rawl lawnglawng in a nung lo, sihmanhsehlaw Bawipa kaa in a chuakmi thil kip in a nung" (Deut 8:3)
 
Thlacam hna usih! "A nungmi Pathian, na Biathiang hmangin nangmah kan in biak khawh caah kan i lawm. Nun damnak na kan pekmi cung zong ah kan i lawm. Na Biathiang kan i hrawmmi hi kan dihlak caah hriangnam ttha ah siter hram law, thlua kan chuah ko tiah na sinah thla kan cam. Amen.
 
Nihin ah Thawngttha a kan chimtu hi USA ah Doctor of Missionlogy a cawng liomi Pastor Hai Vung Lian a si. Tlawmpal ah a cacawn zong a liim cang lai.
Atu cu amah kan sawm colh ko lai:
 
Bible Cang: "Bawipa, Bawipa a ka timi paoh in, vancung pennak chung ah an lut lai tinak a si lo. Vancung khua I a ummi Ka Pa nih, tuah hna seh tiah a duhmi a tuahmi lawnglawng kha an lut lai....Cu Ni cu a phak tik ah, mi tampi nih keimah cu, "Bawipa, Bawipa, na min in Pathian bia kha kan chim; na min in khuachia tampi kan thawl I, khuaruahhar tampi kan tuah" an ti lai. Khitikah an mah cu ka thawh hna lai I, "Nan nih cu a ho nan si kha kan hngal bal hna lo. Kal ko u, thatlonak a tuahtu hna" tiah ka ti hna lai (Matt 7:21-23)
 
Lunglawmhnak: "CIM ah phungchim caan a ka petu hna le caan tha a kan petu kan Pathian cung ah, lunglawmhnak ka ngei. Phungchim reltu dihlak cung zong ah, lunglawmhnak tampi ka ngei.
 
Phungchimnak:
Hi baibal cang hi, a zungzal rel lengmangmi an si. Ka fian ve lo mi le biahalnak tuah zong ah leh khawh lo dingmi tampi aum ve i ruatti hna u sih ti ka duh caah hihi ka thim. Zeicatiah Krifami nih kan i tinhmi a donghnak a phichuak cu, Vancungpennak luh kha a si. Cu Vancungpennak chung luh khawhnak caah, Jesuh nih zeidah biapi ah a chiah hnga timi khi ruatti hna u sih ti ka duh. Hi baibal cang ah hin, phichuah awk a har ngaimi biahalnak an um len.
 
(1) Bawipa Bawipa a timi kip khi vancung pennak an phan lai lo tinak a si. Hihi zeidah a chim duh hnga? Lungthin tak tello in, Pathian duhnak taktak tello in, kaa phaleng in, a lengphaw in Pathian i tlaih te hna, zeizong tuahnak kip ah "Pathian thawng, Pathian thawng" ti in aupi i, lungchung taktak ah Pathian duhnak tuah hleng tunglo in nun te hna; Pathian min hi style sawhsawh le larnak sawhsawh ah aupi i, lungchung le nunnak taktak ah Pathian duhnak tuah hleng tunglo te hna khi maw a chim duh hnga? A tawinak in chim ahcun, "Ka phaleng in Pathian Pathian, Bawipa Bawipa ti i, tuahsernak le nunnak ah Pathian le Bawipa tel hleng tunglo in nun khi maw a chim duh hnga?" ti hi ruah awk an um len.
 
(2) Pa nih tuah hna seh ti a duhmi a tuah mi lawng kha, Vancungpennak chung ah an lut lai. Hi "Pa duhnak" timi te hi, "Zeisette khi dah a si?" timi hi, Jesuh nih hika baibal cang hrawnghrang ah hin a chim fiang theng lo. Mi tampi nih baibal caang dangdang char in, an leh chinmi cu, "Pa duhnak timi cu, a fapa Jesuh zumh hi a si ko" tiah an ti ve. Asinain, Jesuh nih hin, hika zawn ah, "Pa duhnak" timi te hi, "Keimah zumh hi a si ko" timi hi kaa khat hmanh a chim lo. Jesuh nih a chim lo bia maw a si hnga? Jesuh nih a chim ko nain, Matthew nih dah a lak sual hnga? Asiloah a chim lo hrimhrim dah a si hnga? Asiah, Jesuh nih hei chim taktak hlah sehlaw, "Pa duhnak timi te khi zeidah a si hnga? Cucu zeitindah kan hngalh khawh hnga le kan tuah khawh hnga? Cu kan hngalh khawh lo le tuah khawh lo ah zeitindah vancung pennak cu kan luh khawh ne hnga?" ti hi ruah awk ngai in an um.
 
(3) Bawipa, Bawipa, na min in Pathian bia kha kan chim. Na min in khuachia tampi kan thawl i khuaruahhar tampi kan tuah an ti lai.....Ka thawh hna lai i, "Nannih cu aho nan si kha kan hngal hna lo; kal ko u, thatlonak a tuahtu hna" kan ti hna lai...

Hi ka zawn hi, thuk deuh le phun dang deuh in von ruah a hau. Minung kan mithmuh ahcun, "Pathian min aa tlaihmi, phungchim thiam deuh le thlacam thiam deuh, mi lungzur in phungchim thiam le mi hna heh tiah a piantharter kho cuahmah mi hna, Pathian min in thil khuaruahhar tuahmi le mizaw hna a damh kho mi hna cu, vancung kai bak ding khin kan hei ruah ko hna. Khuachia hna thawl khawh le thil khuaruahhar (miracle) hna von tuah ahcun, Vancung khua cu, pello kai bak ding khin hei ruah an si ko." Anmah zong nih an i ruah ve ko lai dah. Asinain, Jesuh mit ahcun, "Pathian min in Pathian bia chimtu si zong ah; Pathian min in khuachia thawl khawhnak power ngeih le thil khuaruahhar tuah khotu si ko hmanh zong ah, vancungpennak ah luh lo khawh a si" timi kha a kan hmuhsak.

Cu tluk in Pathian min tlaih fawn ko tung; khuachia zong thawl khawh le thil khuaruahhar zong tuah khawh ko bu ah, Vancungpennak kainak ding caah zeidah dawntu asi rih hnga? Cu bantuk minung hmanh nih Vancungpennak an luh khawh lo ah, thlacam tiphul hmanh a ngamh ve lo mi nih, zeitindah vancungpennak luh khawh a si ne hnga?"Zeiruang ah dah hi hna pawl hi, Pathian min tlaih in Pathian bia chim ko tung; Pathian min in khuachia zong thawl le thil khuaruahhar zong tuah ko tung ah, "Zeicadah Jesuh nih kan hngal hna lo a ti ne hna lai" Hihi ruah awk taktak a si.
 
Jesuh nih, hi hna pawl hi, a hngalh lonak hna ding le Vancungpennak chung ah an luh lonak ding hi a ruang (reason) fiangte in a chim lo. Cu sualnak, kha sualnak timi a ruang a chim lo. Asinain, Jesuh nih a ruang pakhatte a chim. Cucu zeidah a si tiahcun, "thatlonak tuah" (Matt 7:23) khi a si. "Kal ko u, thatlonak tuahtu hna..." ka ti hna lai a ti.
A tawinak in chim ahcun, "hi thatlonak tuah" te hi, hi hna pawl, Vancungpennak chung luhnak caah, dawntu a rak si tinak a si. Phundang in kan chim ahcun, Bawipa, Bawipa ti lawng a za lo. Pathian min in Pathian biachim, khuachia thawl le thil khuaruahhar tuah ko cuahmah bu zong ah, "Thatlonak tuahtu si khawh a si i, cu thatlonak tuahmi te cu, Vancungpennak chung luhnak ding caah, dawntu a si" ti khawh a si.
 
Matt 7:21 ah, Jesuh nih, Vancungpennak chung luhnak caah cun, "Pa duhnak tuah" a herh a ti. Matt 7:23 ah, Vancungpennak chung luhnak caah dawntu thil cu, "thatlonak tuah" kha a si. Ruah dingmi cu, "Vancungpennak chung luhnak caah a herhmi le a biapimi Pa duhnak tiah Jesuh nih a timi te kha, "thatnak tuah" khi maw a si hnga ti khi a si. Cu thatnak tuah lo ahcun, "mi zeibantuk ca hmanh ah, vancungpennak chung luh khawh ding a si hnga lo" tinak asi hnga. A cunglei minung hna hi, "Bawipa, Bawipa a timi, Pathian min in Pathian biachimmi, khuachia thawl khawhnak le thil khuaruahhar tuah khawhnak thawnnak a ngeimi an si. Mah mithmuh ah, Vancungpennak chung ah a lut bak ding in aa ruatmi; Jesuh hmai le Pathian hmai hmanh ah, Pathian min in thil khuaruahhar an tuahmi le khuachia hna an thawlmi le Pathian bia an chimmi hmanh kha, aa porhlaw ngammi an si. Asinain, hi hna pawl caah vancungpennak cu, co khawh ding a rak si lo. A ruang cu, "thatlonak tuahtu" an si caah a si.
 
A tawinak in chim ahcun, "zei bantuk Krifa si hmanh ah, Pathian riantuantu si lawng a za lo; phungchimtu si lawng a za lo; evangelist si lawng a za lo; khamhfian lawng a za lo; pianthar lawng a za lo; thil khuaruahhar tuah khotu si lawng a za rih lo; zeitluk in zumhnak thawng ngeih le thil khuaruahhar tuah khawh hmanh ah, Krifa nunnak ah, "thatlonak tuahtu" si lo ding le "thatnak tuahtu" si ding hi a herh thiamthiam rih. "Thatlonak tuah" te hi zei bantuk Krifa hmanh nih hrial khawh lo ahcun, cucu Vancungpennak kainak ding caah, dawntu thil a si kho i, Vancungpennak chung luhnak caah, mah le mah i zumh tuknak in, Jesuh nih nang hi a lut kho dingmi na si hi tiah bia kan caih than te sehlaw a dawh. Hihi hi baibal cang hna nih a chim duhmi an si kho men.
 
A tha mi a um ahcun Pathian nih thlawchuah ko seh.

Hai Vung Lian