| Thawngtha by Dr. Val Thang (June 10, 2007) |
|
|
|
| Sunday, 10 June 2007 | |
CIM THAWNGTHAJune 10. 2007 Bia hmaithi: CIM Thawngthabia aa hrawmmi u le nau vialte hna: Bawi Khrih min in nan kut nem kan tlaih hna. Kan nunnak lamthuan chungah hin voitampi cu chum aa zel i khua a mawt caan a um tawn.
Kan hmai ah zeidah a cang lai… zeidah kan ton lai… tiah lungdong in kan um lio caan ah khin a hodah kan hlam tawn cu! “God will make a way” timi Don Moen nih a sakmi hi hi
Thawngtha chimtu kong: Nihin thawngtha a kan chimtu cu Dr. Val Thang a si. Matupi Khuatlatu (founder) an pu Matu PIYIN ( Batu) thok in chan 15 nak a si. Aug 15, 1947 ni ah a chuak. A nu le a pa cu Pu Thang Ha le Pi Bung Kawl an si. 1967 kum ah tang 10 a dih. 1969 kum 5th SEAP Games buai nak ruangah kum 2 sianginn in an chuah caah, 1973 kum lawngah graduated a si. 1974 kum ah U Thant ruak buai nak ruangah thong a tla i, 1979 kum ah a rak chuak tthan. S.A.T a tuan lio ah 1988 kum buai nak ruangah India ah a tli i, CNF thoktu (founder) pakhat a rak si. Ram tang ah kum 4 a um hnu ah 1992 kum ah CNF in aa din i, New Delhi UNHCR huphenhnak tangah um bu in Free Theological Faculty and Seminary; German Bible sianginn ah a kai i, 1988 kum ah Th.M a dih. 1989 kum in India Central Christian Fellowship kut tangah Pastor in a um lio ah 2000 kum ah USA ram ah an chung khar in an rak phan. 2003 kum in Carolina University Of Theology ah Th.D course a peh tthan i, June 2, 2007 ni ah Th.D Degree cu sunglawi tein a kan lak piak. A tu cu thawngthabia lei ah kan kal cang lai. A Ttha (Mark 10:18) Jesuh nih amah cu hi ti hin a ti; " Zei ca-ah dah a ttha tiah na ka ti?" Aho hmanh an ttha lo, Pathian pakhat lawng ti dah lo ah cun.” Hi bia hi, pakhat pa nih,"Cawnpiak tu ttha" tiah a ti ca-ah Jesuh nih a leh nak bia a si. Jesuh nih a leh nak bia hi a tanglei bantuk in phun hninh in ruah khawh a si. 1. ( Negative) Zeicahdah keimah hi “Attha” tiah na ka ti; kaa tthat ttung lo, Pathian lawng pei a ttha ko cu, tiah ruah khawh asi ban tuk in; 2. (Positive) Attha tiah na ka ti mi hi; Pathian ka si nak na theih tak tak i, na ka ti mi maw, a si maw, a si loah ka cawnpiaknak a tthat caah na ka ti sawhsawhmi dah a si tiah ruah khawh a si ve. Mi vialte nih hin, " Kan saduh thah a tlin tik poah le kan duhmi thil kan hmuh, kan ti khawh poah ah hin, Pathian cu a tthatuk tiah kan ti tawn i, kan duhnak tlam a tlin lo poah le harsat, vanchiat kan ton tik poah ah Pathian hi kan mawhchiat tawn. "Kan unua pa pakhat nih USA ram a rak phanh le cangka in a ka chawnh i, a ti mi cu, " Pu Val, Pathian hi attha tuk ti" tiah a ka ti lio ah ka leh mi cu; Aw! atu lawng maw Pathian tthatnak cu na theih, tiah ka rak ti bal. Mi tampi nih Pathian i atthat zungzalnak kan thei tawn lo. Kan khua ah tarpa pakhat nih a fa ngeihchun a thih tikah, " Pathian nangmah hi atthatuk an in ti nain ka fapa na thih ter, keimah tu hi pei na ka thihter ding a si cu” tiah a rak mawhchiat bal. Asinain Job nih cun Pathian tthat nak a theih taktak caah, angeihchiah vialte an thi, an lo dih i, afa nu, afa pa hna zong nih an thih taak dih ko na-in Pathian cu ahmurka hmanhin a mawhchiat lo.( Job 1:22) pin ah a kedil in alu tiang khuaihli hma nih a tlunh i, a tuar ngai ngai kha anu pi nih ahmuh tik ah a zangfahtuk ca-ah, " Na Pathian cu hlaw law, thi cang tiah” ati tik ah, Job nih cun anu pi cu hi ti hin ati: "Mi hrut nu bantuk in holh hlah, Pathian sin in tthatnak kan cohlan bantuk in, Chiatnak zong kan cohlang ve lai lo maw” tiah aleh i, Job nih Pathian cu a hmurka in sual a phaw lo( Job 2:10b). Kan khua i Evangelist pa pakhat nih hla a phuah mi pakhat cu,"Maw Bawipa, kan hal bal lomi van tthatnak na ka pek mi cu, "khuaruahhar vansan ka tonmi hi asi” tiah ati. Pathian tthatnak kan theih tak tak hnu ah cun, taksa tuarnak le chawva ah sifahnak vialte cu kan bawipa Jesuh tuarnak le sifah nak he cun tahchunh tlak a si lo.Cathiang nih ati mi cu, " Attha le Achia vialte keimah nih ka tuah mi an si” tiah ati. Jesuh Khrih i thawhtthan nun a ngei cangmi hna nih cun, thil ttha cung ah si seh, thil ttha lo cung ah si seh, kan hmuh kan tonmi thil cung ah i lawm lo in a ser tu Pathian cung tu ah ani lawm i, a pe tu Pathian tu an thang tthat. Pathian cu minung nih zumh khawh a si lo. Minung hmasabik Adam le Eve hmanh nih cun pei Pathian bia zong an rak ngai lo i, zumh zong an rak zumh lo cu. Ei hlah ti mi bia kha nawl bia asi i, zulh ding a si, zumh ding asi lo. Na thi lai a ti mi bia kha zumh ding asi.An mah sertu Pathian bia tu kha ngaih zong an rak ngai lo i, zumh zong an rak zumh lo pin ah, Satan i tukforh bia tu kha an rak ngai i, an rak zumh ca-ah nang le kei zong nih, Pathian bia zong kan ngai kho lo i, a zumh zong kan zum kho lo. Mi nung kan si nak kha Pathian nih a theih tuk ca-ah nang le kei nawlbia tangah thihnak in a fa pa Jesuh in a kan tlanh i, zung zal nun nak roco tthan ding fapa ah thar in akan ser tthan nak asi.(IICor.5:17; Gal 4:5-6). Cu Jesuh thawhtthan nunnak a ngeimi lawng lawng nih Jesuh cu Pathian asi ti kan theih i, Biatak asi ti kan theih fawn ca-ah Biatak nih a kan luatter ti kan theih cang ca-ah Jesu cu Bawi a si, Jesuh cu Pathian a si tiah kan theih tik lawng lawng ah, "Jesuh cu Pathian tthat nak=(Jesus is the process of God's goodness or Jesus is derived from God's goodness) a si tiah kan theih lai. Jesuh cu Pathian a si tiah an rak theih lo ca-ah Pharisees hna nih cun, Jesuh cu misual asi tiah an rak ti nak kha asi.( John 9:24b) Nang le kei nih Jesuh cu ahodah a si tiah fiang tein kan thei cang maw? Jesuh cu Pathian asi tiah na theih tak tak ca-ah" Attha" na ti maw? Asi lo ah USA na phanh ca-ah asi lo ah na duh mi chawva ttha ttha na ngeih khawh tik lawng ah Pathian cu attha tiah na ti maw? Na nun nak i check ahau cang. Kan Bawi pa Jesuh nih Pathian tthatnak cu kan sin ah a rak tuah i, a langhter ding ah Jesuh nih a kan sawm. Pathian nih a biathiang cu thluachuah a pek cang ca-ah Pathian amin thangthat si ko seh. Amen. Biadonghnak le lawmhnak: Nihin thawngthabia aa hrawmmi u le nau nan dihlak cung ah kan i lawm. Thawngtha a kan chimtu Dr. Val Thang cung zong ah a hlei in lunglawmhnak kan ngei. Hmaizarh cu Fathers Day a si i thawngtha chimtu ah Rev. Dr. Stephen Hre Kio a si lai. Bawi Khrih ah nan hawi, Lal Cung Awi |
|
| Last Updated ( Monday, 11 June 2007 ) |
| < Prev | Next > |
|---|
