Pathian nih damnak le amah biaknak can ttha a kan pek caah amah cu lawmh ko usih! Ahmasabik ah, nawl kan in duhmi hna cu nihin canhmannak hi tuanah kan thlah kho lo. Nichuahlei caah cun cacawn nikhat a si cang lai. Rak kan ruahthiam hram ko u. Cathiang rel ta u sih!

"Mittha mi hna caah cun muihnak chungah khan ceunak a tlang, mi cungah vel a ngeimi le mi zaangfah a thiammi le miding mi hna caah cun ceunak kha a tlang" (Salm 112:4).

Nihin thawngttha a chimtu hi Rev. pa Hrang Hmung a si. A theimi kan tam ko lai tiah ka zumh. TABC ah Youth Director, LABC ah GS, ZBC ah E&M Director le Fangthen Church pastor a rak ttuan bal. Atu hi kawl rawn ah mission rian lei a ttuan i USA ah training a rak kai liopi a si. Thawngttha chim dingah can a kan hmanpiak khawh caah a cungah kan i lawm. Amah kan sawm colh ko lai.

DINNAK KHA TIVA BANGIN LUANTER UH(AMOS 5:24)

Tuzing can ah phungchimnak can tha ka hmuh caah kai Lawm tuk hrinhran. USA ah can tlawmpal ka rak tlawn can hi can tha a ka petu Pathian cung ah le chungttuantu nan sinah lawmhnak tampi ka ngei.

Kan training kainak ah nan thinlung chungah a ummi hmanthlak nan Suai cio lai i a kong nan chim lai ti a si. Ka lung chungah a ummi cu kan ram ah krifa kan ka zaalawnt loning le a kan uktu hna kong kha ka suai i ka chimh hna. An hmaika ah ka dir i ka hmanthlak te cu ka piah hna i ka chimmi cu atu ka hmanthlak hi ka suai hmasa bik a si i a dawh lo ngai lai. A ruahzia rak ka thiampiak uh ka ti hna. Kan can a dih tikah ka hmanthlak suaimi kha a hmasabik suaimi ahcun na thiam tuk an ka ti len. A ngaingai ah an ruah.

Zeicaahtiah a hmanlo  biachim an ngei lo, an thupmi zong a um lo I, dinnak cu an i chuahpi mi a si caah a ngaingai ah an ruah. Keimah caah cun a hmanlo mi ah ka ruat lo. Asinain a hmanlo mi kha a hmanlo tiah ruat loin ka zia ah a can ca ah ka chim mi kha a si. Nihin ah kan ram mi le kan krifa sinnak ah a pawi ngaiin ka ruahmi cu DINNAK hi zei bantuk set kha dah a si? timi hi a thleidan awk that ti loin DINlonak kan tuahmi hi a si. Kan krifa sinak ah DIN lonak cu hmuh har theih har thil pakhat ah a can cang mi hi ngeihchiat awk a si ka ti.

Kan Pathian phung cu DINNAK kong asi nain, DINNAK a tuah lo bik kan si tikah kan phungchim mi cu zeihmanh lo ah a tla. DIN lonak cu kan zia ah a cang i, Kan miphun sinak ah a lut i Din lonak cu DIN lo a si ti a ruah awk thalo ko in DIN lonak ah kan pil. Kan zia ah a cang i kan sinak ah a lut i kan i chuahpi mi  a si cag. Cu kong cu AMos nih Isrealmi dirhmun a zoh tikah a lung a rawk tuk. DIN lonak in an ram an nun cuahmah a hmuh tikah,  a lung a fak tuk i, aho fial loin DINNAK kha tiva bangin luanter uh ati(Amos 5:24).

Amos hi profet chungkhar a si lo. Mi sawhsawh te a si ko nain an ram caah thilrit bantukin DIN lo kong a lungrei a theimi a si. Cu bantukin Kan ram le kan miphun kan krifa sinak ah DIN lonak hi tluk in kan tuahmi kong ah thlacamtu le siaherhtu  DINNAK kong chimtu kan herh cang. AMos nih a chim len nain an ngaih lo caah BC 722 ah Assyrian  sal ah an tla.. DIN lonak hi hmunkip ah kan tuah peng ahcun sal ah
 kan tla sual lai ti phan a um ko.

Nihin Laimi krifa zumtu hna nih kan tuahmi DIN lo ah hi a tlangpi in ka hmuh khawh mi cu;

1. Fimnak kong ah: Kan cacawnnak ah  kan cozah nih a ngeih  caah a si kho men nain dinlonak in fimnak kan kawl. Cun atu lio ah Pathian rian tuantu hna nih Degree kan hmuhmi ah DINlo a tam ngaingai cang.

2.MIssion rian kan tuannak ah kan ram ah DINlonak a tam tuk cang. Pathian fialmi taktak theihnak le a herh caah siloin kan paw cawmnak ah kan miphun a zuarmi kan tam tuk cang. Ngaihchia ngaingai a si. DINNAK a lo ngai nain DINNAK a si lo.

3. Phaisa kan kawlnak ah DINlonak tam tuk kan tuah. Refugee ah, Tangka kan i cuaihnak ah, Ramdang kan kalnak ah, dinlonak tam tuk kan tuah. DINNAK a lo ngai nain ahohmanh DINlo a si ti kan chim duh lo.

4. Zatlang nun ah ahohmanh kan zum ti lomi hi a puai bik. Pathian riantuantu hmanh thilkuat
 kan ngamh ti lo a si cang. Pakhat le pakhat kan i zum lo. Kan nupi le kan pasal hmanh zumh awkin kan um ti lo.

A cunglei ka langhtermi hi a tlangpi in a si. DINNAK tuahnak kong ah sifah tuar ahohmanh kan ngamh lo I, Azeipoh a va si ah rumnak a si poah ahcun, a zeipoh tuah kan ngamh. Cu bantukin a tuahtu cu teitu ah kan ruah i pasal kan ti hna. Asinain Zeitluk in dah kanmah chan chung lawng hmanh siloin kan tefa hna nih an tuar lai ti kan tuak lo. Kan miphun le kan ram caah ttih a nung ngai tiah ka ruah. Hi tin lanh thluamah dawh kan si ko rih i ttih a nung ngai ko. Kan lungput le kan zumhning hrimhrim ah a pil tuk cang. Ihlipphuak awk kan har ngai ko. U le nau hna DINNAK cu kan caah a um lo tluk a si ko.

Zeitindah kan tuah lai?. Rick Warren nih cun kan ruahnak kan thlen a hau a ti, kan ruahmi
 kan thlen ahcun, ka saduhthah zong ai thleng lai. Kan saduh thah kan thlen ahcun, kan ziaza zong ai thlen lai. CU thlennak cu nihin kan miphun nih kan herh ngaingai mi a si tiah ka ruah. (Rom 3:10) ahcun ahohmanh miding an um lo ti bia a um. Asinain cu bia cu Jesuh thisen nih a hrawh i zumtu vialte miding ah hmuh kan si. Cu nunnak chungin a chuakmi DINNAK kan tuahmi cu hmual a ngei i Pathian lung a lawmhter.

Dinnak kan tuah khawhnak ding caah DINNAK a simi Pathian thlarau nih a kan hruai i a kan cawnpiak lawngah DINNAK kan hmuh i kan tuah khawh lai. Chim duhmi cu DINNAK kan tuah ti lonak cu Pathian sinin lam hlaah kan phan cang tinak a si. Mathiai 5:6 ahcun DINNAK tuah kha rawl ttam ti hal bantukin a duhmi cu thluachuak mi an si. Zeicatiah an duhmi kha an hmuh lai. Ka dawtmi hna DINNAK nih a chuahpi mi Pathian thluahchuah i ham uhsihlaw kan nun a sau lai i kan miphun  a him lai.

DINNAK kha tiva bangin luanter in kan  ram le kan innchungkhar kan krifabu, kan miphun hi sersiam hna uh sih. Pathian nih a theitu nan zate cungah thluahchuah in pe ko hna seh. Amen