Sermon by Pu. Roland Maung (July 15, 2007)

Written by Administrator

Thursday, 19 July 2007

CIM thawngttha aa hrawmmi u le nau kan dihlak hi Sertu Pathian nih a kan dawt tuk hringhran ko. Khuaza um ciomi hmunkhat ah thawngttha bianung kan i hrawm khawh caah Pathian cu lawmh usihlaw, a min thiang cu thangtthat ko usih! Nihin thawngtha a kan cawnpiaktu hi Pu. Roland Maung a si. (Thawng Tha Thang pa tiah auh khawh a si). Laimi lakah Washington DC, USA ah khua tla hmasa a si. Pathian nih pahrang tampi a pek. Music tum thiam, hla sak, cattial thiam, biachim thiam le mi bawmh duhnak lungthin a pek i, bochan ngaimi pa a si. Caan tawite chungah thawngttha ttial le chim a kan zuampiak khawh caah a cungah lomhnak tampi kan ngei. Atu cu thawngttha chim dingin amah kan sawm colh ko lai.      A Ping ah kan kal sual  maw?   CIM u le nau nan dihlak cungah hi bantukin thawngtha chimnak caan ttha ka hmuh cu a sunglawi ngai ka ti i, kaa lawm ngai. Kan tlangtar i ruah tti usih ti ka duhmi cu a pingah kan kal sual maw? ti hi a si. Cathiang rel ta usih! "Cucaah a ping i kan kal sual nakhnga lo kan theih mi biatak kha fek chinchin in  kan i tlaih awk asi (Hebru 2:1).   Kan hngakchiat lio cio ah ka tthan tik, ka upat tik ah, cucu si ka duh, cucu tuah ka duh kan rak ti cio hna. Kan tthan ngaingai tikah, kan tining in asi khomi hna nakin asi kho lo mi kan tam tuk deuh tawn. Cucu vawleicungmi vialte kan i khat dih ko rua. Pumpak in, duhnak thinlung tak in, ai zuammi hna, chungkhar nih ttanpi mi hna le thil sining, thil umtuning nih a pekmi hna caah cun  an si duhnak cu an tlinh taktak ko. Minung ah an i chuah taktak ko. Asinain mi tampi cu kan si duhnak lam in thil phunphun ruangah kan pial hna.   Kannih Laimi hna a bikin ram lengah a chuakmi hna van i zok ta hmanh usih. Kan chuah hnawhchan mi a ruang hna cu an i khat thlu hna lai lo. A ttha mi ruahchannak in a chuakmi kan tam deuh lai tiah zumhnak ka ngei. Cu kan i ruahchannak hna a phunphun lakin pathum te van la ta hmanh usih. Fimthiamnak lei in ka tthancho khawhnak caah, ka innchungkhar ka cawm khawh nakhnga, ka bawmh khawh nakhnga caah, ka khua le ka ram caah tthahnem santlai ka si khawh nakhnga caah ti in kan hmuh khawh.   Ram leng kan phanh cio hnuah heh tiah ai zuammi hna le tei a rialmi hna cu caan zeimaw zat a hong kal hnuah cun an i tinhmi an i ruahchanmi cu an phan kho, an hmuh kho taktak hna. Cu lawng asi lo, acheu hna cu  an i ruahning nakin thil ti khomi, rian a ttuan khomi hna an hong si tikah, Pathian thangthat loin um khawh asi lo. Cu lakah cun zei tuak kho loin a hong um mi ruahchannak lam in a hong pialmi kan hong um hna.   Vawelicung ah tinhmi tlinh khawh lo cu ngaihchiat awk ngai asi ko nain cuti piin ttih a nung tukmi asi rih lo. Ttih a nung bikmi cu zungzal nunnak lam in a ping ah kan kal sual maw ti tu hi asi. Cucaah cun ttha tein van i chek (zoh)  ta hna usih.   A ping ah kan kal sual maw ti hi zei tin dah kan i theih khawh lai?   1.   Pathian bianung theih duhnak, ngaih duhnak thinlung a hong zor (Salm 119:1- 11)  2.      Thla kan cam tawn ning in kan cam kho ti lo, kan huam ti lo. 3.      Zumtu hawi dang hna he hmunkhat te ah Pathian biak ti lo (Pumhnak ah i tel duh ti lo)  ( Hebru 10:24-25 ). 4.      Pathian sinah chawva kan pek dingmi tling in kan pe ti lo (Bawmh a herh mi hna  bawmh duh ti lo) ( Luka 6:38). 5.      Pathian thawngthabia mi sinah kan phuang ti lo. 6.      Pathian he kan i naihnak a tlau ( Pathian he i hlat ).   A cung lei kan van chim ningin kan hong um a si ahcun,  a ping ah kan kal pah cang ti i theih khawh asi bantukin  zei ruangah dah a ping ah kan kal sual hnga van zok ta rih hmanh usih.   1.      Midang hna (Pathian thei lomi hna) nih cawh bur in an kan nuamh hnawh, um hnawh, hruai hnawh tikah ( kan el ngam tawn hna lo tikah). 2.      Vawleicung thilri, nuamhnak, minthannak hna nih a van kan khuh tikah ( 1 Johan 2: 15-17 ). 3.      Pathian nih a ka daw taktak lo tiah lunghrinnak kan van neih tikah ( harnak, ngaihchiatnak, buainak kan tawn tikah ) (Hebru 12:6-8, 10). 4.      Tukforhnak a phunphun kan ton tikah kaltak loin, vai tel pah tawn tikah, A ping ah kan sual tawn hna. A ping ah kan pial sual kaa ahcun, a nuam ngaimi a lo nain tlawmpal ahcun,  ee! Khah! Kan van ti le, cuti cun harnak le buainak khur chungah tlak a si pinah thihnak lam tiang a kan phanhter.   Kan kal sual lo nakhnga zeitin dah kan um lai?   1.   Bawipa biatak kha fek tein i tlaih ( Bible rel, Pathian duhning in nun i zuam) ( Salm 119:12-16 ). 2. Pathian biatak a cawnpiakmi krifabu ah i khawmh. 3. Pathian min in kan tlinlonak tlinh khawh i zuam, Pathian duhning in nun i zuam. 4. Zing tinte in Pathian sinah pumpeknak ngeih, ralring tein um kal ( 2 Piter 3:17-18 ).   Cuti kan um khawh ahcun, a ping ah kan kal ti hna lai lo i Bawipa Pathian he zungzal hawikawmhnak kan ngei kho hna lai. A ping ah kan kal sual ah cun, a ping ah ka kal sual cang hi teh ti theih caangkaa in Bawipa sinah ngaihchihnak he kir than colh a hau. Ngaihchih lawng a za lo. Sualnak i phuan, ngaithiamnak  Bawipa sinah hal hnuah, Bawipa nih tuah seh tiah a kan duhmi kha tuah bak ve. Cu hnuah Thiang Thlarau lamhruainak cu zulh i zuam. Cuti cun Zungzal nunnak lampi ah kan kir kho than hna lai.   Kan dihlak in a ping ah kan kal sual nakhnga lo, Kan Bawipa Pathian nih lam kan hruai zungzal ko seh.   Amen.

Last Updated ( Thursday, 19 July 2007 )

 

< Prev		Next >