Israel Pathian
Israel mi nih zeitindah Pathian an biak. Lev. 17:1-4; 18:1-2; 19:1-4
Pathian nih a mi Israelmi hna nih cun dinnak le thianghlimnak in rak ka bia hna seh ti a duh. Sihmanhsehlaw, Israel mi hna cu an P.T duhning in an nung kho tawn lo.
Sualnak le thilthalo kha an tuah lengmang tawn. Cu an tuahsualmi thatlonak ruangah cun Pathian sinah ngaihthiam hal a herh. Cu ngaihthiam halpiaktu cu tlangbawi te an si. Mah bt in sual ngaihchihnak in ngaihthiam an hal tikah saram pakhatkhat kha an thah i biaktheng cungah an khangh tawn. Cu bt an tuahmi cu raithawinak a si. Israelmi pakhat a simi nih cun raithawinak kha a tuah hrimhrim awk a si.
Cathiang kan relmi ah Bawipa nih Moses kha a chonh i Israel mi hna sinah hihi chim;
Ralthawinak kong: (ngaihthiam hal/ pekchanhnak: Thlaithar hna)
Kei cu nan Pathian ka si. Izipt ram nan umnak in Kanaan ram an phanhpitu hna nan Pathian ka si. Nan thian awk asi a ti hna.
Pathian cu a thianghlimmi a si bantukin a biatu hna zong an thianhlim awk a si ve. Pathian nih “Nan nu le nan pa khan an upat hna lai” tiah a fial hna. Nu le pa upat hi P.T duhmi a si. Sabbath ni kha thianghlim tein ulh awk a si. Mah hna hi Pathian duhmi an si. P.T duhnak tuah cu P.T biak cu a si.
Thianhlim: thilpuan tha khi a si hnga maw? Asilo. Thiang tein kholhtawl khi a si hnga maw? Asilo. Mi tampi nih Zuk le hmawm, Zu lawng ah kan ruah sual tawn. An si ve ko. Hi cawnpiaknak kan zoh tik ah a tlangpi in kan hmuh khawh mi cu pumsa nunnak, ngandamnak kong a si. Hi nak thuk deuh in kan zoh ahcun na kih ah cun kit, na lum ahcun lum… Neutral in um hlah a ti. Na chimmi ah Pathian Pathian na ti ko, sihmanhsehlaw na tuah sernak ah Keimah ka si lo ati. Izipt ram in Kannan ram an phanh tertu ka si philh hlah a ti. Lairam in, Malay-India in USA, Canada, Australia … an phanh tertu hi keimah ka si. UN, Embassy le CRC hna an si lo. Lunglomhnak/raithawinak na tuah/na pek ko, sihmanhsehlaw keimah sinah a si lo. Minung sinah na pek i table ah an thutpi, ruat than hmanh… kei cu na Pathian ka si ati.
Lo chungi a chuakmi thlairawl laak tik zongah ek hirhiar in laak dih lo dingin P.T nih a mi cu a chimh hna. Sifaak le rawltuan awk a ngei lomi hna caah nganh bang ding a si a ti. Lo chungah an nganh ta mi facang, fang vui ti bantuk pawl hna hi lo chungah nganh i a taangmi tete kha sifak le lo a ngeilomi hna nih an khawmh ve tawn. Chimduh mi cu Pathian thluachauhnak kha midang hrawmh ve ti a si. Mi bomh nun a si. Kan pekmi fimnak, thiamnak, rumnak hna hi nangmah ca i na hman dih ahcun ka thluachuahnak hi a hmetuk, phungdangin chim ahcun duhdanh a ngei mi ka lo, duhdanh ka ngei lo. Talents dangdang kan pek mi hna vialte kha fawnh dih ding, hman tti ding a si. Ca tialpa aum cu hnachet pa caah a tha. hla sami a um cu mit khua hmu lomi hna caah a si.
Kut-ttial zoh tehna, doih-eih tehna cu P.T nih a duh lo. Khuavang le camhthiam pawl kha hmailei kongkau chimter awkah fuhpanh a duh lo. Prob. 16:1 hmailei kong a theitu, a ngeitu cu keimah hi ka si. keimah sinah ra/ka hal a ti.
Nutar le patar cu nan upat hna lai. Mah nak upa deuh zong upat ding a si, Hmaizah ding a si. Hihi zumhnak he zeidah peh tlaihnak a um ti khawh asi. Kan chim cang bangin pumsa nun cawnpiaknak pakhat a si. Laimi kan nunphung ah aa tel mi pakhat a rak si ko.Sihmanhsehlaw, atu hi a zawr deuhdeuh. Min tial tik zongah Pu/Pi kan rak ti. Ka u, ka nu/pa … kan ni ti, a tu cu Pu/Pi telh loin min tial/ auh a si. An hmai ah hmaizahnak tel loin bia kan chim, kan thu/dir. Here is Aust/US …kan ti, sihmanhsehlaw kan nunphung tha cu hloh ding a si lo.
Khual le mipeem kha nan nihsawh hna lai lo. Nanmah nan i dawt bantukin nan dawt ve hna lai. Nannih zong Izipt ram ah khual nan rak si nain P.T nih a rak in dawt hna tiah a chimh han.
Mi hlen le lihchim cu a thlauh hna. A dikmi cuai thlainak, cuai lung hmaan te nan hman lai tiah a chimh hna. Thil nan zuar tikah hmaan tein nan zuar lai. Jeim cakuat chungah Lei kong cawnpiaknak a um. P.T nih minung a ser tik ah Mit/kut/ke pa 2 cio in a ser, Sihmanhsehlaw Lei cu pa 1 a ser. A sullam cu kan hmuhmi, kan theihmi hna i acheu (?) lawng chim ding a si. Asinain mi tampi nih a let lingin kan hman. Kan hmuh mi, kan theihmi let hnih in kan chim. Cucaah buainak a chuak, harnak kan phan.
A nu le a pa chiat a serhtu cu thah an si lai. Zeitikhmanh ah chiatserh in bia nan i kam lai lo. Nu le pa thih tehna, teek tlaak tehna kha i kam len lo ding a si. Pathian nih a duh lo, P.T baik a si lo a ti hna. Bawipa P.T nih, “Ka nawlbia vialte le ka phunglam vialte kha ttha tein nan zulh dih lai” tiah a ti.
Jesuh nih zeitindah vawlei a kaltak. 1 Cor 15:1-2; Lam 1:1-2
Jesuh cu thlaan chungin a thawh than hnu ah a hawile sinah a lang lengmang. Voikhat cu a zultu hna nih Bawi Jesuh nih rak kal uh tiah a tinak hna Galili ram tlaang pakhat ah an um lio ah Bawi Jesuh cu an sinah a lang i vancung ah akai hnu i an tuah dingmi kha a chimh han. Hi ti hin a chimh hna, “Kal u law,… kei a zungzal nan sinah ka um lai” a ti hna. Mt. 28:19,20.
Hi bia hi Bawi Jesuh nih a zultu hna sinah a chim hmanung bik bia a si. Vawlei cung i a ummi vialte cu ka konglam hi nan chimh hna lai, Jerusalam khuami si hna seh, Samariami si hna seh, vanhramdeng i a ummi si hna seh, tiah a ti hna. Rak tuah hna seh ti a duhmi hna a chimh dih hnu in a kut a hler i thluachuah a pek hna. Annih nih an zoh ko lio te ahcun vawlei in a tho i a sang chin lengmang ah a kai i a donghnak ah khuadawn lakah a lut i an hmu kho ti lo. A zultu hna nih cun kan hmu kho ti tal hnga maw tiah an zoh lengmang, sihmanhsehlaw, an hmu kho ti lo.
Cuti i van an zoh ko lioah cun vancungmi pahnih puan raang aih in an sinah an rung tum i, “Zeicahdah vancung lei zoh in nan dir ko? Tiah an hal hna. “Hi Jesuh vancung i a kai cangmi hi, a kai nan hmuh ning bantukin a ra than lai” tiah an chimh hna.
A zultu hna cu an khuup an i bil i P.T kha an biak. Jerusalem khua ah an kir than i inn cungdot ah khan hmunkhat ah an um. An caan a tam bik cu thlacamnak ah an hman. Thlacamnak lawng cu atu cu Jesuh he an i naih khawhnak lam a si cang. Thla an cam tikah kan sinah a um ti kha bia a kamh hna bangin an hngalh.
A ter ahcun Jesuh cu minung lawnglawng a si tiah an ruah. Duhsah tein P.T Fapa a si kha an hngalh. A thih tikah an khuaruah a har i an ngaih a chia. Zeitindah P.T Fapa nih a thih khawh tiah an ti. Sihmanhsehlaw Jesuh cu a nun tthan tikah, a zultu hna nih an sin i a rak um lengmangmi cu P.T a si kha an hngalh. (Pathian min thangthat si ko seh).
Dawtmi u le nau hna Moses cauk vialte kan rel tikah Kei cu nan Pathian ka si a ti. Profets hna tialmi kan rel tikah Khamhtu sinak ding kong kan hmuh. Thawngtha Uk 4 kan rel tikah Jesuh chuahnak, riantuannak, thih/thawhthanhnak le rianfialmi le a ratthanhnak ding kan hmuh. Paul cakuat Uk 13 kan rel tikah Krifabu & zumhnak kong kan hmuh. Hi vialte hi kannih zong chimh kan si ve.
A hram lei P.T dawtnak kan theih khawhnak hnga kan minung sining a kan chimh. Israel miphung hna sinah Izipt in Kanaan ram an phanh pi tu hna kha Keimah ka si, ka philh hlah u. Thianghlim tein ka bia u. Kut-ttial zoh te hna, khuavang le camhthiam pawl fuhpanh ka duh lo. Mi hlen le lihchim ka duh lo. Nan nu/pa upat hna u, nan nak upa upat hna u tiah an nun khuasaunak hnga, an ngandamnak hnga a cawn piak hna. Kannih sin zongah chimh kan si ve. Nan ramah Missionary a rak thlahtu kha keimah ka si. Nan ram in malay- India ah Ramdang ah an hruaitu hna hi keimah ka si. Ka phialh hlah u. Thianghlim tein ka bia u. Kut-ttial zoh te hna, khuavang le camhthiam pawl fuhpanh ka duh lo. Mi hlen le lihchim ka duh lo. Nan nu/pa upat hna u, nan nak upa upat hna u tiah kan nun khuasaunak hnga, kan ngandamnak hnga a cawn piak. Cun Thlarau leiin Thawngtha kha rak i nun pi uh a kan ti. Thawngtha cu zeidah a si.
Mi sualmi hna P.T he aa tthen cang mi kha Jesuh nih a nunnak pekin a kan khamh, a thisen in kan sual a kan tol i mi luatmi a kan si ter. (Bawipa min thangthat si ko seh).
Jesuh nih a thawhthan hnu ah a zultu hna sinah aa langh than lio ah a chim hmasa bik mi cu Van le vawlei nawlngeihnak vialte cu pek ka si cang a ti. Nang na nunnak ah tah hodah nawl ngeitu a si. Nawl ngeitu a sullam cu Khamhtu le Bawi ka si tinak a si. Nihin ni ah Jesuh Kri hi/cu nangmah pumpak khamhtu le Bawi ah na chia cang maw?
Cu hnu ah a peh tthanmi cu kal u law thawngtha hi va au pi u a kan ti. Hi thawngtha chim hi kan chungkhar in aa thawk a herh. Muslim, Buddish pa lawng khi kan ruah sual hnga. Kanmah zoh hmasa a herh. Jesuh nih ka ra than lai a ti. Ni donghnak ni ah na dawtbik mi na nupi/pasal, na fanu/pa, nu le pa tel loin Hallelujah na ti kho hnga maw? Thlacam na thawh tawn ah na pasal caah, na fapa caah ka lung a dong na ti tawn. Voi zeizatdah mitthil tha in thla na cam cang? Krifa upa hna, Pastor hna na sawm in na lungretheihnak na chim cang hna maw?
Jesuh cu a ra than lai. Chungkhar, hawikom kan tling lo sual hnga maw? Ani, a caan kan thei lo… chun, zan in timh cia in um hna u sih. Jesuh nih thawngtha cu kan chimh hna ning khan fekte in nan i tlaih ko lo maw? Nan i tlaih lo ahcun nan lungthlennak cu pakpalawng a si ko hnga ati. 1 Cor 15: 2
Pathian nih sunparnak co ko seh, Amen. |
