Sermon by Pu Van Dawt Thawng (Aug.19, 2007)
Written by Administrator   
Saturday, 01 September 2007
Nihin caan a kan hman piaktu hi Pu Van Dawt Thawng (Thawngpi) a si. Caan a kan hman piak khawh caah a cung ah lunglomhnak tampi kan ngei.
 
A hmasa bik ah kan biak mi Jesuh min in nan kut ka rak in tleih hna.CIM caan hmannak ah thawngttha chimnak caan ttha  a ka petu Pathian cungah le ttawlreltu upa hna cungah lunglomhnak tampi ka ngei.Kan biakmi Pathian nih CIM rianttuannak le kar hlannak ah thluachuahnak  a pek chin lengmang ti mi ka hmuh tik ah ahlei in Pathian min tthangthat lo in ka um kho lo.Thlachuahnak a kan pek piaktu Pathian min cu thangtthat si ko  seh .Amen
Bible ca kan rel cawlh ko lai.Tuchun ah Pathian bia in thazaang lak tti ka duhmi cu
Daniel 3:17, 29 asi.
 
“Hi kong ah hin kanii in  leh  awk a herh in kan ngal lo; a alh hluahmah mi meiphu chungin kan biak mi Pathian nih kan khamh ahcun a kan khamh ko lai.”
Cucaah ahohmanh ,mi zei miphun chung mihmamh si ko uh, cun nan holh zong zei holh hmamh si ai kun, hi hna Shadrak le Meshak le Abednego hna Pathiann a serhsat mi pauhpauh cu thleh bauh dih nan si lai i nan inn kha chuh nan si lai,tiah keimah(Nebukhadnezzar) nih nawlbia ka chuah; zeicahtiah hi bantuk in mi a khamh khotu Pathian dang seihmanh an um lo, tiah ati.
 
Tlangtar mi: Nangmah le keimah thawngin
Biahmaitthi:- Kan  Chin miphun hi vawlei cung khuazei ram kip ah kan um dih cang lai dah ka ti.Ram khat ah atlawm kan umnak zong aum lai i a tam kan umnak zong aum lai.India Bible sianginn ka kai lio ah ka ngeihchiat bik mi cu Bible sianginn ttha deuh nih   kawlram mi hi  an sianginn kai dingah a  kan pawm duh ti lo.Sianginn tthatnak kai duh hmanh ah kawlram lei in theih hngalh mi nih cattial piak le phone chawh piaknak an neih lo ahcun kai khawh asi ti lo.Ngeihchia ngaingai asi cang.
 
Acunglei Bible cacang ka rel mi ah vun kal cang hna u sih law,kan theihcia dih mi kong asi ko caah a konglam le history background ka chim ti lai lo.Amahbelte an sining hi kanmah ram dang ummi he an i lo ngaingai i cu caah hi Bible cacang hi ka thimmi asi. Judah tlangval pa (3)hna nunnak hin kan hmuh khawh mi thil (5) hrang aum i cu thil kan hmuh khawhmi hna cu kanmah Chin miphun nih kan neih asi ahcun nangmah le keimah thawngin Pathian ram a kau lai i kan ram zong deihnak ahmu lai tiah zumhnak ka ngei.An ngeih mi ziaza pa (5)ning in chimnak caan aum lai lo caah pa (3) lawng kan chim lai.
 
Judah tlangval hna pa (3) nih an neihmi hna cu
Ahman mi le adik mi cungah thih an ngamh:- Nebukhadnezzar nih Dura nelrawn ah sui pathian  a ser i cu a sermi pathian  cu a ram chung ummi miphun vialte nih an biak dihnak lai nawlbia a chuah .A bia duh lo mi cu a alh cuahmah mi meichung ah pei ding in nawlbia  a chuah.Kan mitthlam in vuncuan ter hmanh hna u sih Nebukhadnezzar ram chung ahhin a nungmi Pathian a biami(ahlei in Israel)a um len ve lai va si kaw cu nawlbia  a chuah pah ahcun mi tampi cu , cu sermi sui pathian biak ding ah an i timh cuahmah ko i a taktak a vun phak tik ah an kun dih taktak ko.Asina tein tlangval pa (3) an kun duh lo tiah Bible nih a kan chimh.
 
Zeiruangah cu sermi pathian hmai ahcun an kun duh hnga lo ti ahcun Ahman (adik)mi cung ah thih an ngamh caah asi.Mi tampi (ahlei in Israel pawl) cu kan biakmi Pathian nih kan nunnak him duh ahcun a kan ngeihthiam ko lai atu voikhat cu kun phawt ko u sih tiah ruahnak tampi a nei mi zong an um ko lai sihmanhsehlaw tlangval pa(3) hna nih cun kan tuahmi hi adih mi le ahman mi thil asi lo ti an theih tik ah cu sermi pathian hmai ahcun an kun duh pak lo.Tuchun ni ah kan miphun chungah mah miaknak le tthanchonak ding caah ahcun kan miphun sining le kan khrihfa sining tuaktan ti loin ahman mi le adik mi hlawt tak in thil tuahmi hna kan um sual maw??Kan nunnak i zoh tthan hna u sih law Pathian  mithmai zoh in adik mi le ahman mi tlungthin neih in kar hlang hna u sih.Cu ti kan tuah asi ahcun Pathian nih thluachuahnak a kan pek lai, zeicaahtiah kan biak mi Pathian cu thil hman le thil dik tuah aduh mi Pathian asi caah asi
 
     Zohchunh awk tlak in an um:-Judah tlangval hna pa (3) nih a pahnihnak ah annei mi ziaza cu zohchunh awk tlak in an miphun  sin le miphun dang sin ah an um.Midang nih an tuah le an biak zong ah kannih tu cu miphun dang ca le kan miphun caah zohchunh awk tlak in um u sih ti mi lungthin an nei .Cucaah Nebukhadnezzar nih atuah mi sui pathian an bia duh lo.Hihi zumtu nunnak ah thil biapi ngai mi asi.,Miphun caah le miphun dang caah zohchunh awktlak in nun hi khrihfa mi kan nunnak ah abiapi tuk mi asi.Acheukhat kan ruahnak ahcun kan nu le kan pa , asi lo ah kan hoi le nih a kan hmu ai lo ti lungput neih in kan duhmi kan tuah , kan duh le kan ding kan duh le kan ei.Cu tik ah Khrihfa kan sinak le kan miphun sinak kha kan zuar tawn.Biahmatthi ah ka chim cang bang khan India Bible sianginn ttha ahcun kawlram mi an Bible sianginn ah kai ter a kan duh ti lo.Pakhat ruangah adang zong a tthih dih.
 
Kannih Chin miphun hi khuazei ka ramkip ah aum mi kan si ve bantuk in zeithil kan tuahnak poah ah zohchunh awktlak in nun hi i zuam cio hna u sih.Cubantuk zochunh awktlak a nungmi le kar a hlang mi kan si ahcun hmailei kan kar hlannak ah kan biak mi Pathian,ram a kau lai i  kan miphun hmailei karhlan nak ah lam a kan awnh piaktu thil asi lai.Kan ram ah thawngttha a chimtu an tam cang.Atu kan chan ah cun Pathian thawngttha lawng aza ti lo nun dawh le ziaza dawh nei in thawngttha chim chih aherh cang.Kan biakmi Pathian rianttuan hi a phun a dang cio .khon men.Biadang kan chimh asi ah cun kan umtu ziaza le kan hoiher ning in Pathian thawngttha chim hi a hlei in ram dang aum mi nih kan ngeih cio awk asi.Eph.5:1chung ah kan hmuh mi cu “nannih cu Pathian dawt mi fan an si caah a mah bantuk kha si i zuam u.”Hi nih a achim duhnak cu nun zia dawh in kan nunnak hnga a kan cawnpiak mi asi.
 
Lungrual tein an um:-.Pathumnak an neih mi ziaza cu lungrual tein an um.Daniel Dal (3) rel tik ah lungrual tein an um ti mi biafang hi hmuh asi lo na tein lungrual in an um ti mi hi hmuh khawh asi.Cucu khuazei ah dah kan hmuh ti ah cun Saingpahrang nih ka pathian sermi nan biak duh lo cucaah atu voikhat ruahnak kan pek hna lai i nan biak ko ahcun meiphu chungah kan peih hna  lai lo a ti ah khan Sadrak nih ka hoi le siangpahrang achim mi hi bia hman asi, kan biak mi Pathian nih a kan theih thiam ko lai atu voikhat hi cu biak ko hna u sih tiah  ti khawh asi , sihmanhsehlaw ati hna lo.Cu nih a langhter mi cu an pathum tein an lung  a rual tinak asi.Kannih Chin miphun zong khuazei ka kan umnak cio poah ah lungrual tein kan um le Pathian kan biak tti hi a herh ngaingai mi asi.Pathian nih lungrual tein um hi a duh mi asi i,lungrual tein kan um ahcun Pathian nih thluachuahnak a kan pek hrimhrim lai.Joshua le a ralkap nih Jericho a doh lai ah lungrual tein Pathian nih a chim ning hna tein Jericho khua cu an hel lengmang tik ah Pathian nih teinak a pek hna.Kan miphun chung ah tthanchonak kan duh asi ah cun kan lung a rual a hau,Miphun dang hna tei kan duh hna asi ah cun lungrual a hau.Zeizong vial te ah kan herh bik mi cu lungrual asi.Kan lung a rual khawhnak hnga kan za tein thlacam kan hau.Salm.133:1 “Unau rual I remte in khuasak tti hi zeitluk in dah a tthat I a nomh!’.
 

Bia donghnak

Dawtmi nu le pa, u le nau hna Judah tlangval pa(3) thawng in Babilon ram chung vialte nih a nung Pathian bia dingin  siangpahrang nih nawlbia a chuah tiah Bible cacang kan rel bantuk in nang le keimah thawng in kan umnak ram le khua hna hi Pathian nih a tlen khawh mi asi.Amah belte Judah tlangval pa(3) hna i an neih mi adik  mi le ahman mi cung ah thih  ngamhnak,Zohchunh awk tlak in umnak nun, lungrualnak kan neih lo sual asi ahcun kan umnak ram le khua hi kan thleng kho lai lo. Pathian nih a tete caah thimmi kan si ti i hngal in hi thil hna kan neih khawhnak hnga  kan zapi caah Pathian nih thlachuahnak kan pek piak ko seh.
Amen
Last Updated ( Saturday, 01 September 2007 )