Sermon By Pastor Japheth Lian (Aug, 26, 2007)
Written by Administrator   
Saturday, 01 September 2007
Nihin caan hman kan fialmi relrem lonak te a ngei. Pulpit lawn lai ka sian lo caah keimah nih ka rak hman than.
  Bible: Matt. 6:33                                                                                           

Cucaah zei dang vialte nakin Pathian Pennak le zeidah tuah hna seh ti a kan duhmi kha biapi deuh in ruat u law thil dang vialte hna zong hi an pek thiamthiam ko hna lai                                                                                                         

Nihin i ruah tti dangah tlangtar ka duhmi cu Jesuh fial ning in  ti a si.

Kan Cathiang relmi hi kan zoh tikah hmailei kong cawnpiaknak a si.

Jesus hi hmailei thiltha hmuhnak ding caah fial a hmang theu tawn.

- Peter le a hawi le kha nga tampi an tlaih khawhnak ding caah nan sur kha a thuhnak lei ah chep u a ti hna. A fial ning hna in an cheh i nga tampi an tlaih.

- Gana khua nupi thitnak puai ah umpu ti khahter u tiah a fial hna. A fial ning hna in  an khah ter i wine ah a can ter.

- Mizengpa a damter lio ah na ihphah i laklaw kal, a ti. A fial ningin a ihphah cu aa lak i a kal kho taktak.

- Mi 5000 rawl dangh lio zongah changreu dar 5 le nga 2 rak pu u a ti hna. Hi bantuk a fialnak hna hi Bible ah tampi kan hmuh khawh. Jesuh fialning le cawnpiakning in tuah le zulh cu hmailei lam tluannak, thluachuah hmuhnak a si.

Nihin Cathiang kan rel mi ah Pathian Pennak le zeidah tuah hna seh ti a kan duhmi ruah  hmasa a kan fial.

Minung hna nih kan nun chung caah lungretheihnak in kan khat. Ei le din, thilpuan, Inn & lo, rian, Bill pek ding, Ca cawnnak, Krifabu caah thawhbur, dam lonak phun phun in kan lungre a thei.  Lungretheihnak hi upa ca lawng a si lo. Kum no mi kan fa nau hna ca zongah a si. Khuazei college ah dah ka kal lai, nupi – pasal caah duh thimnak, le a dang dang…

Lungretheihnak hi mi zapi nih kan ngeihmi a si. Krifa a si mi zong nih kan ngeih i Krifa a si lomi hna zong nih an ngeih ve.

Jesuh zong nih ei le din awk kan duh mi a theih. Rian kan kawlmi, Bill pek kan herhmi a theih. A chimmi cu Vancung khua i a ummi nan Pa nih hi thil vialte cu nan herh dih hna ti kha a hngalh ko (6: 32). Cucaah zei dang vialte nakin Pathian Pennak le zeidah tuah hna seh ti a kan duhmi kha biapi deuh ah ruat u law thil dang vialte hna zong hi an pek thiamthiam ko hna lai, a ti.

Nihin ni ah pumsa lei he pehtlai in pumpak in, chungkhar in lungretheihnak kan ngei cio lai. Kam khat lei ah Krifabu he pehtlai in Mino nih siseh, Nu Bu nih siseh, Bupi nih siseh kan ni tinhmi cio hlawhtlinnak ding caah lungretheihnak kan ngei cio lai, a bik takin Krifabu thanchonak caah kan lungre a thei ko hna lai. Sihmanhsehlaw, a min hmanh ah Krifabu rian a si mi hi Pathian duhnak kawl hmasa loin tuah khawh a si lo. Amah Pathian sunparnak cu kanmah fimthiamnak le khuakhannak men nihcun a tuah kho lai lo. Pathian duhnak kan tuah hmasa a hau.

A si ahcun Pathian duhnak cu zeitindah kan tuah lai. P.T duhnak tuah cu zeidah a si?

A kan fialmi kan tuah hlan ah;

1. Rian a kan fialtu hi fiang tein kan theih hmasa a herh. Amah cu zei zong vialte Sertu a si. (Gen 1&2). Van le vawlei nawlngeihnak vialte cu Amah sinah pek a si (Matt. 28:18).

2. Rian a kan fialmi kan tuah hlan ah Amah dawtnak kan theih hmasa a herh. Minung nih a kan dawtu hna rian fialmi tolh hi kan duh hrim lo, tlinh kan i zuam theu tawn.

A dawtnak kan theih fian khawhnak tuanbia pakhat chim ka duh. Africa ram ah sa kap pa, saneh dawi thiam pa a um ti a si. Voi khat cu saneh a hmuh i a dawi. A dawi lengmang i tupi chungah a lut. Khuaka ka kal ti awk a thei ti lo, a hmailei zong a zoh lo, saneh lawnglawng cu a zoh. Vanchiat ah a hmai ah cerhbual a um i cu cerhbual ahcun a tla. A cawl lengmang a chuak kho ti lo, cu lio ahcun zawng nganpi nih thing kung cung in hri a rak chanh i a chuak kho. A chuah hnu ah zan a si cang, khua ka kal   awk a that ti lo caah thing kungpi hram ah zawngpi nih cun a thutter, ramlak i a ummi banhla le thei dangdang hna a pek. Khim tein a ei. A hna a ngam. Zawngpi nih cun thing kung cung cun a hngah. Mipa cu a paw a khim, a hna a ngam, a lung a hung fim i saneh a dawi mi kha a theih. Sa dawi mi ka si tung, taklawng in inn tlun cu a ti i a cungi a ummi, a nunnak a chanhtu zawngpi cu a kah.

A thaizing khua a dei cun zawng a kah mi cu a neh a dawi. A thi a tla mi cu a dawi lengmang i an inn pawng thingkung cungin zawngpi nih cun a rak hngak. Kal umnak a thei ti lomi kha a kah mi zawngpi nih a thisen in lam a hruai. A lung a fim hlei lo, a tleih i a fa le he lente celhnak ah zawngpi cu an hman, a hma a fah tuk caah a thih tak hna.

Dawtmi u le nau hna kan nih cio zong hi saneh dawi thiam pa bantuk kan si hna. Vawlei cungah kan hmaika lawng kan zoh, kanmah ca lawng kan zoh. Cun lio ahcun cerh chungah kan tla. Cu chung cun Jesuh nih a kan chuah. A ngeihmi Krifa thei tlai a kan pek. Krifa thei tlai cu zeidah a si. Dawtnak a si, kan minung hawi hmangin a kan dawt, ram tha ah a kan hruai. Krifa kan sinak dah ti lo cu Laimi kan nun ah uahpi awk a um lo. a nunnak pekin a kan dawt(Jn 3:16).  Kan thei kho lo i Vailamcung ah kan kah. A thi a chuak. Cu a thisen a chuak mi nihcun zungzal nunnak lam ah a kan hruai. (Pathiann min thangthat si ko seh)

A kan fialtu kan theih cang, A dawtnak zong kan theih cang, zeitindah a duhnak kan tuah hmasa lai. A kan fial caah kanmah tuah dingmi a si.

  1. P.T duhnak tuah hmasa ding ahcun kan duhnak kha Pathian bia nih a uk a herh. Pathian kha Nawl ngeitu, 1st nak ah kan chiah a herh. Pathian sinah ipehnak kan ngeih chin lengmang a herh.
  2. 2. P.T duhnak tuah hmasa ding ahcun Setan riantuannak kan doh a herh. Setan riantuannak lakah tih a nung ngaingai mi pakhat cu keimah tinak hi a si. Pathian dawtnak thawngin ram tha kan phan. Pathian dawtnak thawngin mipi hman in a riantuantu ah a kan thim. Pathian dawtnak thawngin riantha kan hmu. Hi thil vialte hna hi keimah sinak,felnak ti a fawi te. Paul nih Efe.  Cakuat chungah a tialmi ah  Khamh nan si cu Pathian vel thawngin a si, hi kong ahhin nan i phorhlawt khawhmi zeihmanh a um lo a ti. Cun Thawngtha riantuantu ka si hi P.T laksawng a si a ti.  
            Bawipa Jesuh ni 40 a cam hnu ah Setan riantuannak kha ruat hmanh u.
  •  Pathian Fa  na si ahcun lung hi changreu ah can ter tuah a ti.
  •  Biakinn cungin zuang law vanmi nih in tlai hna seh a ti.
  • Tlang cungah a kai pi i na khuh na bil i na ka biak ahcun na hmuhmi hmun vialte hi kan pek lai a ti. Hi lio caan Judah mi nun kan zoh tikah Rom cozah nih a uk hna, pumsa thlarau chanhchuahtu Messiah an hngah lio caan a si. Jesuh nih lung kha changreu ah can ter seh, Biakinn cungin zuang sehlaw vanmi nih tlai hna sehlaw a min a thang tuk hnga. Rom cozah pi kha a tei tuk hna lai i an siangpahrang a si colh ko lai. Cu dirhmun i a ummi Jesuh nih keimah aa ti lo. Jesuh nih Setan a doh, a fialmi a tuah duh lo. Why? Setan nih vawlei kan pek lai a timi vialte a ngeitu cu Pathian a si ti kha fiang tein a theih. Setan a doh i Pathian duhnak a tuah hmasa, P.T 1st nak ah a chiat caah P.T nih sunparnak a pek. Steven lungin an cheh lio ah Jesuh cu P.T orhlei kam ah a dir kha a hmuh. (Pathian min thangthat si ko seh)
3. P.T duhnak tuah hmasa ding ahcun kanmah kan i hmuh hmasa a herh. Pathian fiang te  i hmuh hnu lawngah mah tlinlonkha i hmuh a si i, mah tlinlonak le sualnak kan i theih hnu lawngah Pathian kan panh chin tawn. Kanmah kan i hmuh hmasa a herh.
A Cunglei ah kan hmuh bantuk in;
  • Peter le a hawi le kha nga tampi an tlaih khawhnak ding caah nan sur kha a thuhnak lei ah chep u a ti hna. A fial hna ningin an cheh i nga tampi an tlaih.

  • Gana khua nupi thitnak puai ah umpu ti khahter u tiah a fial hna, an khah ter i wine ah a can ter.

  • Mizengpa a damter lio ah na ihphah i laklaw kal, a ti. Aa lak i a kal kho taktak.

Hi tuah sernak nih a kan cawnpiakmi cu Jesuh cu a let tampi in pe khotu a si. Nga tampi a pek hna. Jesuh cu khuaruahhar tuah khotu a si, Ti kha wine ah a can ter. Jesuh cu Damnak pe khotu a si. Mizenpa kha a kal ter.

Dawtmi u le nau hna;
  •  Jesuh cu Sertu Pathian a si. Khamhtu Pathian a si. Damnak Pathian asi, bawmtu Pathian asi. (Damnak na herh maw/ bawmtu na herh maw?)

  • Van le vawlei nawlngaihnak cu pek ka si cang ati. Nang na nunnak ah tak nawl a ngei cang maw?

  • A fial ningin a tuahmi poh cu hlawh tlinnak an hmu. Nifa kan nunnak ah lungretheihnak (Rian kongah, sianginn kai nak ah, Bill peknak kongah, Nu le va kongah …) Na herhmi vialte hi Pathian nih a theih dih, a ngeih dih, kan pek lai, kan tuah piak lai … Sihmanhsehlaw

Kan fialmi hna hi tuah hmasa u; Pathian Pennak le zeidah tuah hna seh ti a kan duh timi kha biapi deuh in ruat u law cu hnu ah

Thil dang vialte hna (ei le din, thilpuan, nupi-pasal, …) zong hi an pek thiamthiam  ko hna lai a ti.

Jesuh fial ningin tuah cu hlawh tlinnak a si.

Pathian nih sunparnak co ko seh, Amen. (Japheth)